İntizar!

Araz Gündüz

Bu külək nə qəmli nağıl danışır-

Orda sevənlərın müşküldü işi.

Buludlar toplaşıb, hava qarışır,

Mən göyü bəs necə ovudum indi?!

Bu yazın günündə nələr olacaq:

İldırım yaracaq göyün bağrını-

Göyün yarasından qan açılaсaq,

Lalə tək səpəcək yerə ağrını…

İldırım səsindən diksinəcəksən,

Göyün yarasından xəbərsiz qalıb:

Lalə mövsümünə sevinəcəksən,

Lalənin yasından xəbərsiz qalıb…

Küləkdən titrəyən bu yarpaqların

Mənim ürəyımə oxşarı çoxdur,

Kövrəlib ağlayan buz bulaqların

Neynim, gözlərimə oxşarı yoxdur!..

Qalmışam səssizlik içində çünki

Göylər harayımdan uçula bilər!

Dərdimi bulağa danışmadim ki,

Gözü tutulunca ağlaya bilər…

Sən də dünya ilə bir qayna-qarış:

Nağılda qalmasın darda sevənlər;

Mənə gözlərinlə bir nağıl danış,

Vüsala yetişsin orda sevənlər!..

1983

BENZER HABERLER

Hiç yorum yapılmamış.