SEN GİZLİ GÜNAHIMSAN!

Günü əyləncəliyəm,
Dərdə öyrəncəliyəm.
Yenə sənsiz dəliyəm,
Yozulmaz izahımsan,
Sən gizli günahımsan

Olmasan da halalım,
Sənsən eşqim, vüsalım.
Varım, cahü cəlalım,
Qənirsiz sabahımsan,
Sən gizli günahımsan.

Sən günah, mən günahkar,
Ola bilmirik aşkar.
Mənə sahib-ixtiyar,
Ümidim, pənahımsan,
Sən gizli günahımsan.

Düşüb çəməndə bilmir –
Bənövşə bəndə, bilmir.
hər şeyi bəndə bilmir,
Allaha agahımsan,
Sən gizli günahımsan.

Sən etdiyim qəbahət,
Kimə isə xəyanət.
Mənə saf bir məhəbbət,
Alov saçan ahımsan,
Sən gizli günahımsan.

Eşq-i məmnusan əslən,
Bəxti tükdən asılan.
Ancaq göydə kəsilən
İlahi nikahımsan,
Sən gizli günahımsan.

17 oktyabr 2017